عمر بين الحياة .... والموت
في محضن نص متر في متر
لمحتك زي ورداية
بتتجهز تعيش بكرة
كَما الأطفال بتتجهز ليوم العيد
وعامل فيها بنى آدم
وبتخبـّط...وبتعيط
وعامل دوشة مع إنك
يادوبك لسة من ساعة
منوّر دفتر المواليد
لمحتك زي عصفورة
يادوب من ساعة مولودة
وفرحانة بجناحاتها
ومش قادرة تطير لِبعيد !!!
لمحتك وانت بتحارب
مع المرض اللي بيحاول
يِدَبّـِل وردتك لكن
لأول مرة اشوف وردة
إذا دبلت...جمالها يزيد
تفوت أربع شهور كاملة
يدوس على ضحكتك مرضك
و لسة ضحتكك طارحة
وقلبك برضو لسة عنيد
وكل عيوناّ ما تشوفك
خلاص سَلـّمْت و هتمضي
على شهادة وفاة حِلمك
بنتفاجإ بإنك كنت في الآخر
بتمضي العقد بالتجديد !!!
ملامحك فيها حِنيـّة
وبتحارب..عشان ألمك... مايزرعشي
مكان حنيّتك تجاعيد
بِتتقطّع في كل دقيقة بتعدّي
ما بين حلمك...وبين وجعك
بإيد للجَرح مِتّاخد
و ماسك حلم بكرة بإيد !
وكل ما قصتك تِخْلص
و ديك الفجر بِيأذّن
و سيّـاف الألم ييجي
فَيِطلَع شهريار حلمك يقوللك...عيد
عيونك عالسما بتبُص
وطولك لسة شبر و نُص
ملاك نايم
وبيحاول...يادوب يلمس شعاع الشمس
بإحساسه اللي لسة وليد
و كنت بَشوف ...عيون كل اللي حواليّا
بتسألني
رضيت إزاي لأحاسيسك
تِعَلّقها بمريض ممكن
يكون عمره اللي جاي... مِش جاي؟؟
ساعتها بلاقي احساسي
يُرد بكل إحساسي
ومن امتى القلوب عارفة
هتتعلق بمين و إزاي !!!
ومايحبَّكش قلبي ازاي
وانا شوفتك في اول ليلة من عمرك
و وزنك كيلو و شوية !
ومايحبَّكش قلبي ازاي
و أنا شوفتك...قصاد عيني
كِبِرْت شوية بشوية
ومايحبكش قلبي ازاي
وانا لو ايدي جت حواليك
إيديك تِمْسك على ايديّا؟؟؟
و كان يِصْعب على قلبي
اشوفك و انت مِتكتّف بأوجاعك
بتشحت مـ ِ الجهاز نَفَسَك
و تشحت مـ ِ الحياة نَفْسَك
و ده كله و بتعافر !!!!!!!!!!!!!
و يفضل برضو شئ جواك
ماهوش راضي... يسيب الدنيا و يسافر
و رغم الجوع...وشوق البطن للرضعة
صَبُوووور لسة.... و روحك لسة مش خاضعة
و بِتعلّــم قلوب الناس
بإن الجوع ماهوش كافر !!!!!!
حياتك فيها شئ خلاك
تدوب فيها...لآخر لحظة في حياتك
صمود ذاتك ماهوش راضي
تهون ذاتك على ذاتك
و نـِنْ عينيك على المونيتور
متابع رسم دقاتك
و قطر قلوبنا في الزحمة
في وقت ما فات عليك....فاتك
بِحساباتنا وحسابات الكتب بنقول
عُمر هيموت
و في الآخر... بنرمي كل حساباتنا
عشان انت...لوحدك ليك.. حساااباتك
زمان خَدْنا في كتب الطب ان الطفل أدّامه
شهور ياما
عشان ينطق...عشان يضحك...عشان يفهم و يتكلم
وانا أول ما شوفت عينيك
لاقيتها إزاي...بتضحكلي.. بتفهمني؟؟...بِتتكلم !!!!
بتتألم إذا ضـِحـْـكـِـت فَتِضْحك لما تتألم
و أنا رغم السنين بينّا
و رغم الفرق في الموازين و في الأطوال
وقفت قصادك أتعلم!!!!
وقفت قصادك أتعلم...صمودك وانت بتحارب
يهيج مرضك بموجُه عليك...فتعمل ضحكتك قارب
ولما نتيجة التحليل تقول موجب
ألاقي عينيك تقوللي استني .. ماتخافشي
أنا بكرة هكون سالب!!
أنا اتعملت ان الطب
ماهوش بالطو وسماعة
ماهوش وَرديّة مخنوقة تفوت ساعة ورااا ساعة
انا اتعلمت ان الطب روح قادرة تِكمّل روح
ومهما قلبها المجروح بيوجعها
تعيش تضحك في وسط الناس..تعالج قلبها المجروح!!
عشان كده كنت آخر يوم و انا شايلك
كما الورداية في كفوفي
هِربت كتير من الدمعة اللي خنقاني
ما بين حبي...وبين خوفي....
و شايف جوة عين مامتك...سؤال تايه
بِيتلهّف...يلاقي اجابة في حروفي
أنا يابْنِي
برغم الفرحة جوّايا
هياكل قلبي ميت وسواس
عُمَر خارج...ولكن يااااااتَرَي بكرة
هيبقى زيّنا و يكبر
و يضحك ضحكة زي الماس؟؟
ياتري هَيْحِب وهَيتحَب ؟
عيونه هتتملي بالنور
وقلبه هيتملى احساس؟؟؟؟
هيبقى في الحياة ضهري؟
هيسندنا في وسط الناس؟؟
طريق بكرة طويل لسّة
طويييييييل و احنا غلابة اوي
و نِفسي يدوسه ويّانا
لكن خايفة عليه يِنداس
ساعتها بَرُد...مش عارف
ساعتها بَـبُص في عيونك
عـُمَر بالله عليك أرجوك
أمانة وانت بِتخطِـّى
على أول طريق بكرة
تِخطٌى بمنتهى القوة
ماتخذلنيش
قلوب أهلك هناك واقفة بتستناك
فإوعى يا عـُمر ماتجيش
أنا اتعودت من قلبك على القوة
أنا عايزك...تعيش الدنيا من جوّة
وما تعيشهاش على الهامش..عشان قلبك
بجد خسارة في التهمّيش
هناك مامتك بتستناك
تحضر ساندويتشاتك
وتتدّاري تبص عليك من الشباك
و مشتاقة
للحظة و إنت متأخر في مدرستك
و رغم قلقها فرحانة لإنك جيت
و لحظة تكون بتضرب فيك
عشان كسّرت عفش البيت!!!
ولحظة لما تيجي في يوم
تفرّحها...بدرجات امتحان الشهر
ولحظة وانت بتشيلها على كتافك
و بتلففها في الكعبة
عشان تِرْحَمْها من قسوة آلام الضهر
عُمر ...شايف...سفينة بكرة مستنية احلامك
لكن يمكن ماتستناش
أنا هرضَى أكيد باللي
يكون ربك كاتبهولك
أكيد جوة القدر حكمة
ولو حتى ..هيفضل عقلنا الضيّق مايفهمهاش
و ياما سنين بنحلم إننا نعيشها
ويبقى الخير ..في إن قلوبنا ماتعيشهاش
و يمكن بكرة في السكة
وشوشنا لما تتقابل...ماتعرفنييش
ولا َ تعرف بإنك لسة جوّايا
ويمكن وقتها نخبط في بعضينا
فتتنرفز و تتخانق أوي معايا !!!
ويمكن بكرة تعزمني على فرحك
وترقص يومها ويايا
ويمكن بكرة دا كلّه مايحصلشي
لكن يومها...إيمانّا بحكمة اللي خلقنا هتخلّى
قلوب أهلك و ويّاهم ..قلوب كل اللي بيحبوك
أكيد هتقابل المكتوب...بِضِحكاية
و انا كفاية
في محضن نص متر في متر
لمحتك زي ورداية
بتتجهز تعيش بكرة
و جه بكرة...بميت حاجة بتجرح فيك
و تدبح فيك
لكِنّك يا عُمر دايما
فضلت فـْ عيني.... ورداية
محمود أبوالعزم
posted by Maha Youssef @ 9:46 ص
0 Comments:
إرسال تعليق
<< Home